Sjaldan veiðst jafn margir stórlaxar í Laxá

Við erum nýbúin að greina frá stórlaxaveiðum á Nessvæðinu í Laxá í Aðaldal en þar er lítið lát á veiði á stórlöxum.

Í morgun komu hið minnsta tveir á land sem vitað er um og aðrir tveir komu á land í gær ásamt því að Hafsteinn Orri Ingvason náði stærstu hrygnu sumarsins sem var á að giska um 26 pund.  Það er með ólíkindum hvað mikið hefur veiðst af 100 sm og stærri löxum þar í sumar og það er ennþá nóg eftir af tímabilinu til að bæta um betur.  Jón Þór Tynes og Jason Guðmundsson komust í 20 punda klúbbinn í hollinu sem er nú að ljúka veiðum en Jón þór sem hefur veitt þetta svæði lengi hefur þrátt fyrir mikla ástundun ekki náð því fyrr en nú að komast í klúbbinn.  Við óskum honum og Jason til lukku með stórlaxana og bíðum spennt fregna af fleiri löxum í yfirstærð sem veiðast á Nesi í haust.

Það fór loksins að rigna í dag á vesturlandi og norðvesturlandi svo það er vonandi að hækka vatnið í ánum sem svo sárlega hafa þurft hressilega vætu á tímabilinu og það gæti þýtt að lokaspretturinn í ánum verði góður.