Zlatan hættir eftir EM

Sænski landsliðsmaðurinn Zlatan Ibrahimovic tilkynnti í dag að hann myndi hætta að leika með landsliðinu eftir EM.

Svíar spila við Belgíu á morgun og það gæti orðið hans síðasti landsleikur fyrir Svía enda Svíar í erfiðri stöðu á mótinu.

Fastlega var búist við því að hann myndi spila með Svíum á ÓL í Ríó en nú er ljóst að af því verður ekki.

Framtíð framherjans í boltanum er enn óljós. Hann er samningslaus hjá PSG en er sterklega orðaður við Man. Utd.

Hann fékk þó ekki að klára sín mál á meðan hann væri að spila á EM. Zlatan er orðinn 34 ára gamall.