Kjötlausar kjötbökur bökuðu MAST skaðabótaskyldu

Matvælastofnun er skaðabótaskyld vegna tjóns sem Kræsingar ehf., áður Gæðakokkar ehf., urðu fyrir vegna tilkynningar sem birtist á vef stofnunarinnar í febrúar 2013. Þetta var niðurstaða Héraðsdóms Reykjavíkur í gær.

Forsga málsins er sú að í kjölfar fregna frá Evrópu, þess efnis að hrossakjöti hefði verið blandað í matvörur í stað nautakjöts, var gerði könnun á því hvort slíkt hefði gerst hér á landi. Í því skyni voru meðal annars kjötbökur frá Gæðakokkum kannaðar. Í ljós kom að í tveimur bökum hefði ekkert kjöt verið að finna þrátt fyrir að innihaldslýsing gæfi til kynna þrjátíu prósent kjötinnihald.

Tilkynning um kjötskortinn var birt á heimasíðu Matvælastofnunar og meðal annars sagt að farið hefði verið fram á innköllun á tilgreindum vörum Gæðakokka vegna þessa. Fyrirtækið var síðar ákært fyrir brot á lögum um matvæli og reglugerð um merkingar á matvælum en sýknað í héraðsdómi þar sem ekki þótti sannað að ásetningur hefði legið að baki brotinu eða að umrædd kjötbaka hefði verið óhappatilvik.

Sökum þessa höfðaði fyrirtækið mál til viðurkenningar skaðabótaskyldu. Að sögn Kræsinga kemur fram voru rekstrartekjur ársins 2012 tæplega 133 milljónum á ári en í kjölfar tilkynningarinnar hafi verslanir sagt upp samningum við fyrirtækið. Nauðsynlegt hefði verið að segja upp starfsfólki, farga birgðum og breyta nafni fyrirtækisins. Skaðabótakrafan byggði á því að tilkynning Matvælastofnunar hefði verið ólögmæt þar sem reglum um málsmeðferð hafi ekki veirð fylgt.

Héraðsdómur féllst á þessar röksemdir meðal annars með vísan til þess að stofnunin hefði ekki haft valdsvið í málinu. Með aðgerðum sínum hefði hún farið inn á verksvið Heilbrigðisnefndar Vesturlands. Þá var einnig talið að Gæðakokkum hafi ekki verið gefinn kostur á að kynna sér og tjá sig um niðurstöðurnar áður en tilkynningin var send út. Að lokum var fundið að því að tilkynningin hafi ekki verið efnislega rétt en í henni var fullyrt að innköllun á vörunum hefði farið fram. Svo var eigi.

Í yfirlýsingu frá Matvælastofnun kemur fram að stjórnendur stofnunarinnar muni á næstu dögum fara yfir málið ásamt lögfræðingum sínum áður en ákvörðun verður tekin um hvort málinu verði áfrýjað til Hæstaréttar.