Haukar langbestir á þessari öld

Haukar urðu í gærkvöldi Íslandsmeistarar karla í handbolta annað árið í röð þegar liðið lagði Aftureldingu, 34-31, í oddaleik að Ásvöllum í Hafnarfirði. Þetta úrslitaeinvígi var rafmagnað og sögulegt en í gærkvöldi voru það Haukarnir sem réðu lögum og lofum. Þó aðeins hafi munað þremur mörkum á endanum voru Haukar mest níu mörkum yfir í seinni hálfleiknum.

Þessi Íslandsmeistaratitill hjá Haukunum er sá tíundi á þessari öld en þeir hafa nánast drottnað yfir karlahandboltanum síðan þeir unnu sinn annan Íslandsmeistaratitil eftir 57 ára bið árið 2000. Þeir standa öllum framar þegar kemur að titlasöfnun og eru svo sannarlega með besta liðið á þessari öld. Tíu titlar komnir á 16 árum en næsta lið er Fram með tvo og fjögur önnur lið skipta svo með sér brauðmolunum sem Haukar hafa skilið eftir fyrir þau.

„Þetta er alveg ótrúlegt – sjáðu húsið, sjáðu stemninguna,“ sagði Gunnar Magnússon, þjálfari Hauka, í samtali við Vísi rétt eftir lokaflautið er hann tók utan um blaðamann og horfði upp í kjaftfulla stúkuna. „Við spiluðum svo ótrúlega vel. Strákarnir voru alveg frábærir – algjörlega stórkostlegir,“ sagði Gunnar.

Tveir með tveimur liðum

Gunnar þekkir það ágætlega að vinna í oddaleik á Ásvöllum. Fyrir tveimur árum stóð hann á sama stað – bara hinum bekknum – og vann oddaleik um Íslandsmeistaratitilinn sem þjálfari ÍBV á móti Haukum. Víkingurinn hefur þjálfað handbolta alveg frá blautu barnsbeini en er nú algjörlega að stimpla sig inn sem einn albesti þjálfari landsins.

Haukarnir lentu í smá basli undir lokin og misstu niður góða forystu en þjálfarinn var meira en lítið sáttur með sína stráka. „Markvörðurinn þeirra fór að verja eins og svo oft áður en við náðum að halda rónni og klára þetta. Ég er svo ótrúlega stoltur af drengjunum,“ sagði Gunnar.

Mikið álag var á Haukaliðinu í úrslitakeppninni og sérstaklega lokaúrslitunum en breiddin fyrir utan hjá liðinu er ekki mikil. Þar báru Janus Daði Smárason, Adam Haukur Baumruk og Elís Már Halldórsson hitann og þungann af sóknarleiknum. Þessum leik verður þó ekki lokað nema minnast á þátt Eyjamannsins Hákonar Daða Styrmissonar sem var algjörlega magnaður og skoraði tíu mörk. Þvílíkur happafengur sem hann var fyrir Haukana.

„Adam, Janus og Elli spila nánast hverja einustu mínútu. Það er ótrúlegt hvernig þeir fara að þessu,“ sagði Gunnar Magnússon.

Vill gera betur en pabbi

Adam Haukur Baumruk átti flottan leik í gær. Hann skoraði sjö mörk og átti sex stoðsendingar. Hann var magnaður í rimmunni og skoraði í heildina 39 mörk. Þar af komu 32 á heimavelli. Honum líður vel á Ásvöllum enda uppalinn í húsinu.

Aðspurður hvers vegna hann skoraði 32 mörk heima en „aðeins“ sjö mörk úti svaraði Adam öskrandi af gleði: „Tilfinningin er frábær. Auðvitað spilar maður best heima fyrir framan fulla stúku þar sem allir eru að hvetja mann. Ég elska að spila svona leiki!“

Adam er eins og flestir vita sonur goðsagnarinnar Petrs Baumruk sem er húsráðandi að Ásvöllum. Hann fylgdist með syninum í kvöld og fagnaði hverju marki af krafti. Petr vann fyrstu tvo Íslandsmeistaratitla Haukanna á þessari öld en nú er Adam búinn að vinna þá tvo síðustu og búinn að jafna föður sinn. Takmarkið er skýrt. „Markmiðið er að sjálfsögðu að vinna fleiri titla en pabbi. Hann tók tvo og nú er ég kominn með tvo. Ég stefni að því að fara fram úr honum á næsta ári,“ sagði Adam Haukur Baumruk.