Vök og Seven Lions saman í eina sæng

Í síðustu viku kom út myndband við lagið Creation með Seven Lions ásamt íslensku hljómsveitinni Vök.

Seven Lions er amerískur raftón­listar­maður og plötusnúður sem hefur spilað á mörgum helstu raftónlistarhátíðum Bandaríkjanna auk þess að hafa unnið með og endurhljóðblandað lög með nokkrum fjölda þekktra tónlistarmanna, eins og Florence and the Machine og Röyksopp.

Vök er eitt heitasta bandið á landinu um þessar mundir og hefur verið að spila hér og þar um heiminn.

„Hann finnur okkur í gegnum plötufyrirtækið sitt og biður okkur um að senda sér demó af þessu lagi. Við sömdum demó og sendum honum og hann valdi það úr nokkrum. Hann fílaði okkar best,“ segir Margrét Rán Magnúsdóttir, söngkona Vakar, spurð að því hvernig þetta samstarf hafi komið til.

Myndbandið við lagið var framleitt af Tjarnargötunni og leikstýrt af Adda Atlondres og Frey Árnasyni. Díana Rut Kristinsdóttir leikur síðan í því.

En hvað er svo fram undan hjá Vök?

„Við erum að vinna að nýrri plötu sem ætti að koma út snemma á næsta ári, bara í janúar. Við erum að fara tvisvar til útlanda í sumar. Við vorum á mánaðar ferðalagi í febrúar og mars, fórum til tíu eða ellefu landa í Evrópu og það var rosa gaman.“