Tjörvi við Gaupa: Það eru stærri áföll í lífinu heldur en þetta

Haukar eru án leikmannsins öfluga Tjörva Þorgeirssonar í úrslitaeinvíginu um Íslandsmeistaratitilinn en hann meiddist mjög illa á hné í undanúrslitunum á móti ÍBV.

Guðjón Guðmundsson, íþróttafréttamaður 365, fór og hitti Tjörva og forvitnaðist nú um stöðuna á honum nú þegar félagar hans í Haukaliðinu eru í miðjum lokaúrslitum á móti Aftureldingu.

Tjörvi var borinn af velli í fjórða leik Hauka og ÍBV í Eyjum. Tjörvi hefur verið einn besti leikmaður Íslandsmótsins síðustu ár og segir að auðvitað hafi þetta verið mikið áfall.

„Ég held að mesta svekkelsið hafi verið strax og þetta gerðist. Ég heyrði smellinn og þá vissi ég að þetta væri mjög líklega krossbandið," sagði Tjörvi Þorgeirsson í spjalli við Gaupa.

„Það var mjög mikið svekkelsi en svo skánaði þetta. Maður verður bara að vinna í þessu og taka þessu eins og maður. Það eru stærri áföll í lífinu heldur en þetta," sagði Tjörvi.

Tjörvi Þorgeirsson var búinn að skora 17 mörk í fyrstu 7 leikjum Hauka í úrslitakeppninni og var með 66 mörk í deildarkeppninni í vetur.

„Þetta er tækifæri fyrir mig til að vinna í bæði líkamlega og andlega þættinum. Ég er strax kominn með prógramm frá sjúkraþjálfurunum fram til ársins 2017. Ég ætla bara að klára þetta eins og maður og koma sterkari til baka," sagði Tjörvi.

Hann segir að andlegi þátturinn geti verið erfiður sérstaklega í kringum leiki liðsins. Það fer ekkert framhjá neinum að Hauka sakna Tjörva mikið inn á vellinum í úrslitaeinvíginu á móti Aftureldingu.

„Ég ætla að reyna að taka þessi af jákvæðni og vonandi gerir þetta mig bara að betri leikmanni," sagði Tjörvi en það smá sjá allt innslagið frá Gaupa hér fyrir ofan.