Cersei þarf nauðsynlega á efnahagsráðgjafa að halda

Eins og flestir vita eflaust vita hefst sjötta þáttaröð Game of Thrones á sunnudagskvöldið. Margt er um að vera í söguheimi George RR Martin og má þar helst nefna að hinir dauðu séu á leiðinni og margar styrjaldir eru háðar víðsvegar um heiminn. Eitt stærsta vandamálið og jafnframt það sem leiðtogar Westeros virðast ekki hafa áttað sig á, snýr að efnahagi ríkisins.

Leiðtogar Westeros og þá sérstaklega Cersei Lannister, þurfa nauðsynlega á góðri efnahagsráðgjöf að halda. Efnahagur Westeros er gjörsamlega í rústum og Cersei, sem stjórnar krúnunni, virðist ekki átta sig á því. Jafnvel virðist hún ekki hæf til þess að stýra ríkinu.

Hinn umsvifamikli banki Iron Bank frá Braavos hefur lánað öllum helstu áhrifamönnum Westeros gífurlega mikið fé. Krúnan er skuldsett í bak og fyrir og í stað þess að borga niður skuldir ákvað Cersei að endurbyggja flotann sem eyðilagðist í orrustunni um Kings Landing. Eins og sagt er í Westeros mun Járnbankinn alltaf fá sitt og hefur hann jafnvel stutt Stannis Baratheon gegn krúnunni til að fá vilja sínum framgengt og sjá til þess að skuldir ríkisins yrðu greiddar.

Þá hafa aðrir bankar söguheimsins hætt að lána til kaupmanna Westeros og eru utanríkisviðskipti Westeros nánast engin.

Þar að auki hefur matarkarfa Kings Landing, The Riverlands, orðið illa úti vegna átaka. Ofan á allt þetta nálgast svo veturinn, eins og hann gerir alltaf.

Þetta rifjar pistlahöfundur 1843 Magazine upp og segir líklegt að Cersei og aðrir leiðtogar Westeros þurfi nauðsynlega að halda rétt á spöðunum í næstu þáttaröð Game of Thrones, vilji þeir koma í veg fyrir uppreisn á yfirráðasvæðum sínum.

Ekki nóg að vilja vel

George RR Martin, höfundur A Song of Ice and Fire, segir að hann hafi lagt mikið upp úr því að skoða efnahag söguheims síns. Í viðtali við Rolling Stone árið 2014 nefnir hann sem dæmi að það hafi Tolkien aldrei gert í sögum sínum. Þar hafi sú regla gilt að ef konungurinn var góður þá blómstraði landið.

Hins vegar spyr hann hver skattastefna Aragorn hafi verið. Hvernig hann myndi bregðast við hamförum og fleiri atriði sem snúi að efnahagsmálum Middle Earth.

„Í raunveruleikanum þurftu konungar að eiga við raunveruleg vandamál. Bara það að vera góður maður var ekki svarið. Þeir þurftu að taka erfiðar ákvarðanir. Stundum gæti ákvörðun sem virtist vera góð snúið aftur og bitið þig í afturendann. Ég hef reynt að koma þessu viðhorfi fyrir í bókum mínum. Fólk sem er að reyna að stjórna ríkjum á það ekki auðvelt. Það að vilja vel gerði menn ekki að góðum konungum.“

Í síðustu þáttaröð kom í ljós að krúnan skuldaði kirkju Westeros verulegar fjárhæðir. Í stað þess að borga skuldina komst Cersei að samkomulagi við forsvarsmenn kirkjunnar um að endurvekja Faith Militant regluna. Reglan hafði verið bönnuð á öldum áður eftir misheppnaða en langlífa uppreisn gegn Targaryen konungsfjölskyldunni.

Það samkomulag leiddi til þess að Cersei var neydd til að ganga nakin um götur Kings Landing þar sem íbúar borgarinnar hreyttu í hana fúkyrðum og köstuðu jafnvel skít í hana.