Sveinbjörn í Garðabæinn

Stjarnan hefur fengið góðan liðsauka fyrir átökin í Olís-deild karla á næsta tímabili því í kvöld skrifaði markvörðurinn Sveinbjörn Pétursson undir tveggja ára samning við Garðabæjarliðið.

Sveinbjörn kemur til Stjörnunnar frá þýska B-deildarliðinu Aue sem hann hefur leikið með undanfarin fjögur ár.

Sveinbjörn kemur til með að styrkja lið Stjörnunnar gríðarlega mikið en hann hefur leikið átta A-landsleiki.

Sveinbjörn lék með Akureyri og HK áður en hann hélt utan en hann var valinn markvörður ársins 2011 þegar Akureyri lenti í 2. sæti í deild og bikar.

Stjarnan féll úr Olís-deildinni í fyrra en endurheimti sæti sitt þar með því að vinna 1. deildina í vetur.