Umfjöllun og viðtöl: Grindavík - Snæfell 62-92 | Snæfell slátraði Grindavík

Snæfell rúllaði yfir Grindavík, 92-62, í næstsíðustu umferð Dominos-deildar kvenna í körfubolta í dag en leikurinn fór fram í Röstinni í Grindavík. Heimastúlkur áttu aldrei möguleika í leiknum og því fór sem fór.

Grindvíkingar komust yfir í upphafi leiks  og var þá staðan 5-2. Mikil stemning var í herbúðum heimamanna en það slokknaði á henni fljótlega þegar Snæfellingar hrukku í gírinn. Fljótlega voru gestirnir komnir með fjórtán stiga forskot og staðan 24-10 fyrir Snæfell þegar fyrsti leikhlutinn var liðinn.

Snæfell hélt áfram að uppteknum hætti í öðrum leikhluta og hélt áfram að keyra upp hraðan og auka við forskot sitt. Denise Palmer var ótrúleg í fyrri hálfleiknum og gerði 18 stig, tók níu fráköst og gaf átta stoðsendingar. Snæfellingar náðu mest 26 stiga forskoti í hálfleiknum, 48-22, og var leikur Grindvíkingar í molum.

Snæfellingar skoruðu fimm fyrstu stig síðari hálfleiksins og það var ljósta alveg frá upphafi hálfleiksins að þær ætluðu ekkert að slaka á. Fljótlega var staðan orðin 57-30 fyrir Snæfell og leikurinn í raun búinn. Grindvíkingar réðu einfaldlega ekkert við hraðan hjá gestunum og keyrðu Snæfellingar bara yfir heimastúlkur í síðari hálfleiknum. Það er skemmst frá því að segja að Grindvíkingar áttu aldrei möguleika og lauk leiknum með auðveldum sigri Snæfells, 92-62. Snæfell náði mest 32 stiga forskoti, 90-58, í fjórða leikhlutanum.

Haiden Denise Palmer var atkvæðamest í liði Snæfells með 23 stig, 15 fráköst og tíu stoðsendingar. Magnaðar tölur frá henni. Bryndís Guðmundsdóttir gerði 17 stig fyrir gestina. Í liði Grindvíkinga voru það Ingunn Embla Kristínardóttir og Whitney Michelle Frazier sem gerðu 15 stig hvor.

Bryndís: Ætlum að toppa á réttum tíma

„Við komum bara svo ákveðnar til leiks og ætluðum að sýna hvað við getum í raun og veru,“ segir Bryndís Guðmundsdóttir, leikmaður Snæfells, en hún skoraði 17 stig fyrir liðið í dag.

„Við spiluðum svo rosalega góða vörn og það var það sem skóp þennan sigur. Við höfum ekki verið nægilega góðar undanfarið og þetta kom loksins í dag.“

Bryndís segir að liðið hafi spilað eins og það gerir best í dag.

„Við ætluðum bara að spila okkar leik og það skipti engu máli hver staðan væri, við vorum ekkert að fara hætta. Við erum að undirbúa okkur fyrir komandi átök og þurfum að vera góðar á réttum tíma.“

 

Daníel: Þurfum að mæta mun betur til leiks gegn Keflvíkingum

„Við hættum bara að vinna saman í upphafi leiksins og spiluðum virkilega slaka vörn,“ segir Daníel Guðni Guðmundsson, þjálfari Grindavíkur, eftir leikinn.

„Þegar maður spilar svona varnarleik á móti eins sterku liði þá á maður aldrei séns,“ segir Daníel og segir að eins og staðan er í dag sé gæða munurinn á þessum liðum svona mikill.

„Þetta snýst samt mikið um hvernig við mætum í leikina, þetta snýst ekkert alltaf um það hversu góður þú ert í körfubolta. Ég var ekkert sérstaklega ánægður með það hvernig við mættum í þennan leik.“

Hann segir að liðið þurfi að mæta allt öðruvísi til leiks gegn Keflavík í næstu umferð en það er algjör úrslitaleikur um sæti í úrslitakeppninni.

Ingi: Stelpurnar svöruðu því sem ég hef verið að kalla eftir

„Ég er mjög ánægður með stelpurnar og þær svöruðu því sem ég hef verið að kalla eftir,“ segir Ingi Þór Steinþórsson, þjálfari Snæfells, eftir leikinn.

„Það var margt mjög jákvætt í þessum leik og mér finnst varnarfærslan hjá okkur alveg að koma. Þegar við mætum svona ákveðnar til leiks og þá gerast góðir hlutir.“ Ingi segist vera ánægður með alla leikmenn liðsins en þær komu allar við sögu í leiknum í dag.

„Þegar við ætlum okkur góða hluti þá erum við erfiðar við að eiga. Við fengum framlag undir körfunni í dag og það hefur ekki gengið í langan tíma.“

Ingi segist vera klár í úrslitakeppnina en það sé samt sem áður einn leikur eftir í deildarkeppninni.

Bein lýsing: Grindavík - Snæfell

Tweets by @Visirkarfa1