Umfjöllun og viðtöl: Akureyri - Haukar 17-28 | Haukarnir komnir með sex stiga forystu á toppnum

Haukar unnu enn einn stórsigurinn á Akureyri í vetur þegar þeir leituðu að snúa við blaðinu frá því síðastliðinn föstudag þegar liðið tapaði í bikarúrslitum gegn Val. Leikurinn endaði 17-28 fyrir Hauka .

 

Jafnræði var með liðunum lengi framan af leiknum og var það að miklu leiti þeim Tomas Olasyni og Giedriius Morkunas, markvörðum liðana, að þakka en þeir vörðu báðir mörg skot í fyrri hálfleik. Það var ekki fyrr en í kringum 25.mínútu sem Haukar fóru að sigla fram úr Akureyringum og voru með fimm marka forskot í hálfleik, 6-11.

 

Akureyringar náðu að halda sér inn í leiknum og virtust ætla að færast nær gestunum en ekki leið að löngu þar til Haukar gáfu í aftur. Leiknum lauk eins og áður segir með ellefu marka sigri Hauka og sitja þeir enn í toppsæti Olís deildar karla.

 

Tomas Olason varði tuttugu skot fyrir Akureyri en Halldór Logi Árnason var markahæstur heimamanna með fimm mörk. Hjá Haukum var Janus Daði Smárason, Brynjólfur Snær Brynjólfsson og Hákon Daði Styrmisson allir með fimm mörk en Giedrius Morkunas varði 21 skot og Grétar Ari Guðjónsson varði sjö.

 

Andri Snær: Sóknin varð okkur að falli

 

„Við erum alltof fljótir að gefa eftir. Við erum í basil sóknarlega nær allan leikinn en Haukarnir eru það gott lið að við getum ekki verið að klikka svona mikið af dauðafærum eins og í dag. Við skjótum mjög illa úr góðum færum og þeir eru fljótir að refsa,” sagði Andri Snær Stefánsson, fyrirliði Akureyrar eftir enn eitt stór tapið gegn Haukum í vetur.

 

Þrátt fyrir stórt tap þá leit Andri á björtu hliðarnar hjá sínum mönnum og taldi lið sitt hafa spilað góða vörn og markvarslan var fín en það voru vandamál á hinum vallarhelmingnum sem kostuðu þá mikið.

 

„Við stjórnuðum hraða leiksins vel fyrstu 25 mínúturnar og góð byrjun hjá okkur. Góð vörn og góð markvarsla en það var aðallega nýting á dauðafærum og erfið sókn sem varð okkur að falli,”

 

 

Gunnar Magnússon: Þeir fengu okkur á mjög slæmum tíma!

 

Það leyndi sér ekki að tapið í bikarúrslitunum gegn Val um síðastliðna helgi situr í Gunnari og leikmönnum hans hjá Haukum. Hann var sáttur með viðbrögð sinna manna eftir vonbrigðin og taldi Akureyringa óheppna að hafa þurft að mæta liðinu á þessum tímapunkti.

 

„Við gátum ekki beðið eftir að komast á gólfið eftir síðasta föstudag. Akureyringum til varnar þá fá þeir okkur á mjög slæmum tíma hingað því við erum enn svekktir og óánægðir með sjálfa okkur síðan þá. Við vildum komast aftur á gólfið og svara fyrir þetta,” sagði Gunnar.

 

Jafnræði var með liðunum lengi vel framan af leiknum en Haukar náðu að byggja upp forskot á síðustu mínútum fyrri hálfleiks. Gunnar taldi þó sína men hafa getað gert betur í fyrri hálfleik og gert út um leikinn fyrr en er mjög sáttur með seinni hálfleikinn.

 

„Við erum með fimm tækileg klúður í hraðaupphlaupum í fyrri hálfleik svo við hefðum nánast getað klárað þetta í hálfleik. Við mættum hrikalega grimmir til leiks og vorum mjög góðir í dag. Vörn og markvarsla var mjög góð í dag og sóknin lengi í gang. Sóknin var betri hjá okkur í seinni hálfleik. Heildarbragurinn á liðinu var bara mjög góður,”

 

Haukar styrkja stöðu sína á toppnum og eru í ágætis málum eins og er. Gunnar er staðráðinn í að missa ekki af þessum titli.

 

„Að sjálfsögðu ætlum við að klára þetta. Það er næsti leikur og önnur tvö stig, við þurfum fleiri stig og við ætlum að klára þetta,” sagði Gunnar.