Rangar fréttir af Tiger

Umboðsmaður Tiger Woods er ekki ánægður með nýjustu fréttir af skjólstæðingi sínum sem hann segir vera rangar.

Því var nefnilega haldið fram að það hefði komið bakslag í bata Tigers eftir þriðju bakaðgerðina. Að hann gæti ekki setið án þess að finna til og væri í vandræðum með að labba.

„Þetta eru fáranlegur sögur og hreinlega rangar,“ sagði umbinn sem heitir Mark Steinberg.

„Það er óþolandi að reglulega þurfi einhver að búa til svona sögur. Tiger er á fullu í sinni endurhæfingu og við munum greina rétt frá stöðu mála þegar það er hægt.“

Tiger hefur ekki keppt í hálft ár vegna meiðslanna. Hann fór fyrst í bakaðgerð í mars árið 2014. Hann fór svo í aðgerðir í september og október á síðasta ári og framhaldið er vissulega í óvissu hjá honum.