Tómas gefur út lag við ljóð Atómskálds

Tónlistarmaðurinn Tómas Jónsson, sem hefur komið víða við í íslensku tónlistarlífi undanfarin ár, undirbýr nú í fyrsta sinn breiðskífu í eigin nafni.

Ekki er ólíklegt að tónlistarunnendur hafi komið auga á Tómas á hinum ýmsu tónleikum síðustu ár en hann er einn af þessum íslensku tónlistarmönnum sem virðist stundum vera allstaðar. Þeir sem hafa til dæmis verið á tónleikum með Hjálmum, Ásgeiri Trausta, blúsbandi Björgvins Gísla, Fjallabræðrum, útgáfutónleikum Helga Björns eða á leiksýningunni í Hjarta Hróa Hattar hafa að öllum líkindum séð þennan unga, síðhærða hljómborðsleikara í góðum fíling.

Meðfylgjandi er tónlistarmyndband við lagið Að komast burt – The City of Reykjavík, sem er það fyrsta sem heyrist af væntanlegri breiðskífu Tómasar. Atómskáldið Sigfús Daðason (1928-1996) les sjálfur ljóðið sitt en sú upptaka er hluti af safni ljóða hans lesin af Sigfúsi, sem kom út árið 1997.

Að sögn Tómasar þá fékk hann leyfi frá eftirlifandi eiginkonu Sigfúsar, Guðnýju Ýr, fyrir því að nota ljóðið og fyrr í vikunni fengu þau sér kaffisopa saman og hlustuðu á lagið. Sagðist hún vera viss um að Sigfús hefði verið ánægður með afraksturinn.

Auk þeirra Tómasar og Sigfúsar spilar Magnús Trygvason Eliassen á trommur, Friðjón Jónsson tók upp, Finnur Hákonar hljóðblandaði og hljómjafnaði og myndvinnsla var í höndum Arctic Project.