Guðlaugur spáir í lokaúrslitin: Ég held að Haukar vinni fyrsta leikinn

Afturelding og Haukar hefja leik í úrslitaeinvígi Olísdeildar karla í handbolta í kvöld. Fyrsti leikurinn verður í N1-höllinni í Mosfellsbæ og hefst klukkan 19.30. Fréttablaðið fékk Guðlaug Arnarsson, þjálfara Fram, til að rýna í úrslitarimmuna.

Hvernig fer hléið með liðin?

„Haukarnir hafa verið ofboðslega sannfærandi í úrslitakeppninni en það er spurning hvernig þetta langa hlé fer með þá, hvort þeir nái að halda dampi eða ekki. Það hefði verið best fyrir þá ef úrslitin hefðu byrjað sem fyrst eftir undanúrslitin,“ sagði Guðlaugur, en tvær vikur eru síðan Haukar spiluðu síðast á meðan Mosfellingar léku oddaleik við ÍR 26. apríl sem þeir unnu á ævintýralegan hátt.

„Fyrsti leikur gæti einkennst af því að liðin eru að koma úr löngu fríi. En þetta verður hörkurimma og allir leikirnir verða spennandi. Bæði lið spila sterka vörn, eru með góða markmenn og búa yfir mikilli breidd sem þjálfararnir hafa nýtt vel. Þetta eru sennilega þau lið sem eru með mestu breiddina í deildinni,“ sagði Guðlaugur en bæði Patrekur Jóhannesson, þjálfari Hauka, og kollegi hans hjá Aftureldingu, Einar Andri Einarsson, hafa spilað á mörgum mönnum í úrslitakeppninni.

Stuðningsmenn Aftureldingar hafa eflaust legið á bæn undanfarna daga og vonast til að Jóhann Gunnar Einarsson verði klár í slaginn fyrir úrslitaeinvígið en þessi öflugi leikmaður meiddist á öxl í öðrum leiknum gegn ÍR.

Af þeim sökum missti hann af öllum leik þrjú og langstærstum hluta af fimmta leiknum. Hann lék þó með í fjórða leiknum sem Afturelding vann og tryggði sér það með oddaleik á heimavelli.

Örvhentu skytturnar mikilvægar

„Það hefur mikil áhrif á leik Aftureldingar ef hann er ekki með,“ sagði Guðlaugur um Jóhann, sem er í algjöru lykilhlutverki í sóknarleik Mosfellinga, auk þess sem hann býr yfir mikilli reynslu.

„Það sýnir samt styrk liðsins að það fór í gegnum ÍR án Jóhanns. Ungu strákarnir þeirra hafa styrkst mikið í vetur,“ bætti Guðlaugur við.

Önnur örvhent skytta, Árni Steinn Steinþórsson, vaknaði heldur betur til lífsins í úrslitakeppninni eftir erfiðan vetur. Árni stimplaði sig rækilega inn í átta-liða úrslitunum gegn FH, þar sem hann skoraði 18 mörk í tveimur leikjum, en sóknarleikur Hauka er allt annar og betri þegar Selfyssingurinn nær sér á strik.

„Árni er búinn að vera frábær í úrslitakeppninni og sýndi loksins sitt rétta andlit. Það breytir Haukaliðinu ef hann er heitur, því þá eru þeir með skotógn báðum megin fyrir utan. Fyrir vikið verður sóknarleikurinn hættulegri,“ sagði Guðlaugur, sem hefur einnig hrifist af frammistöðu hins tvítuga Janusar Daða Smárasonar sem skorar og leggur upp mörk jöfnum höndum.

Haukar líklegir í kvöld

Guðlaugur segir að heimavallarrétturinn gæti skipt sköpum en frábær stemning hefur verið á leikjum Aftureldingar í úrslitakeppninni.

Þrátt fyrir að Mosfellingar séu með heimavallarréttinn spáir Guðlaugur Haukum sigri í kvöld.

„Ég held að Haukar vinni fyrsta leikinn og taki frumkvæðið í einvíginu. Þá mun reyna mikið á Aftureldingu,“ sagði Guðlaugur.