Bæði VR og aðildarfélög Flóabandalagsins, Efling, Hlíf og Verkalýðs- og sjómannafélag Keflavíkur, undirbúa nú kosningu meðal félagsmanna um heimild til verkfallsboðunar.
Þá gengur hvorki né rekur í viðræðum sem þegar eru komnar í hart og verkfallsaðgerðir hafnar eða boðaðar, svo sem í viðræðum Starfsgreinasambandsins (SGS) við SA og viðræðum Bandalags háskólamanna (BHM) við ríkið.

„En þetta verkefni fer ekkert frá okkur að finna leiðir til kjarasamninga. Núna er hins vegar ljóst að staðan er orðin miklu þrengri og við förum í að skoða okkar bakland varðandi boðun verkfalla.“
Sigurður segir ekki ljóst hversu langan tíma þessi vinna taki. Félagar hjá Flóabandalaginu eru um 21 þúsund talsins. „En staðan er þannig núna að fullreynt er með viðræður í augnablikinu.“
Sigurður segir búið að fara yfir sérkröfur, en allt standi fast þegar komi að viðræðum um launalið krafnanna.
Heimildir blaðsins herma jafnframt að hjá VR sé búið að draga upp einhverjar hugmyndir kæmi til þess að viðræður rynnu út í sandinn.
Þannig gætu mögulegar aðgerðir hafist um eða upp úr 20. næsta mánaðar.
Þungi er í undirbúningnum en stjórn VR samþykkti í gærkvöldi að færa tvo milljarða króna úr félagssjóði í Vinnudeilusjóð VR, sem nú stendur í þremur milljörðum.

Þá stóð yfir fundur í kjaradeilu BHM og ríkisins síðdegis í gær, en ekki var búist við stórtíðindum fyrir hann.
Páll Halldórsson, formaður samninganefndar BHM, sagðist fyrir fundinn geta fullyrt að á honum yrði ekki skrifað undir nýjan samning. „En hvort við verðum eitthvað nær því eftir fundinn veit ég ekki.“
Páll sagðist þó telja að það hlyti að fara að renna upp fyrir mönnum að eitthvað þyrfti að gera til þess að leysa deiluna. Þannig væri alveg ljóst að hugmyndin um 3,5 prósenta launahækkanir, hvort heldur sem er hjá ríki eða á almennum vinnumarkaði, væri út af borðinu.

„Það skilar sér vonandi til hans samningamanna.“
Verkfallsaðgerðir í gangi og í pípunum
Fyrsta verkfall í aðgerðum SGS verður núna á fimmtudag, en þá hefur verið boðuð allsherjarvinnustöðvun frá tólf á hádegi til miðnættis. Þá hefur verið boðuð allsherjarvinnustöðvun 6. og 7. maí, 19. og 20. maí og svo ótímabundið verkfall frá og með 26. maí.
Fjögur aðildarfélög BHM hafa verið í ótímabundnu verkfalli í þrjár vikur, eða frá 7. þessa mánaðar; geislafræðingar, lífeindafræðingar, lögfræðingar hjá Sýslumanninum í Reykjavík og náttúrufræðingar á Landspítalanum.
Þá hafa ljósmæður verið í verkfalli þrjá daga í viku. Þá hófust fyrir viku ótímabundin verkföll hjá náttúrufræðingum og háskólafólki á matvæla- og næringarsviði hjá Matvælastofnun auk dýralækna. Háskólamenntað starfsfólk Stjórnarráðsins er svo í verkfalli milli 20. apríl og 8. maí.