Aríur og fleira tengt Maríu

Hanna Þóra Guðbrandsdóttir sópransöngkona og Antonía Hevesi píanóleikari flytja ljóð, bænir og aríur sem tengjast heilagri Maríu á hádegistónleikum í Laugarneskirkju á morgun, föstudag. Einnig flytja þær aríu eftir Mozart.

Hanna Þóra og Antonía hlaupa í skarðið fyrir Bylgju Dís Gunnarsdóttur sópran og Díönu Lind Monzon gítarleikara sem urðu að hætta við boðaða dagskrá vegna veikinda.

Tónleikarnir hefjast klukkan tólf og standa yfir í um hálfa klukkustund.

Aðgangseyrir er fimmtán hundruð krónur og ekki er posi á staðnum.