Sýna stuttmynd í San Francisco

Stuttmyndin Poster Boy verður frumsýnd á kvikmyndahátíðinni SF Indiefest í San Francisco laugardaginn 14. febrúar. Myndin er framleiðsluverkefni Icelandic Poniez sem Ragnhildur Magnúsdóttir Thordarson stofnaði ásamt bróður sínum, Pétri Gaut Magnússyni.

„Myndin er í þessum stíl sem við höfum verið að vinna með, sem er svört kómedía. „Hún fjallar um fordóma gegn samkynhneigðum sem er auðvitað ekkert fyndið mál en sagan fjallar um hinn þrælskeggjaða Buck Baker sem þykist framleiða áróðursplaköt fyrir fordómafullan sértrúarsöfnuð í skini þess að hjálpa þeim fjárhagslega. Hann er með önnur plön í gangi,“ segir Ragnhildur.

Hún og Pétur Gautur ólust upp í Norður- og Suður-Kaliforníu og búa bæði og starfa í Los Angeles. Pétur starfar sem leikstjóri, tökumaður og handritshöfundur og Ragnhildur hefur unnið við framleiðslu, m.a. fyrir kvikmyndaverið 20th Century Fox og handritssmíði.

„Það verður gaman að fara í heimaborgina til að frumsýna hana. Það er ágætt að hún kláraðist. Mér var mikið flökurt í tökunum og var auðvitað með hugann annars staðar, en okkur tókst þetta að lokum,“ segir Ragnhildur, sem eignaðist dóttur í maí í fyrra.