Söng fyrir samanlagt sex þúsund manns

Í hvaða skóla ertu Gunnar Hrafn og hvaða námsgrein er í uppáhaldi?

Ég er í Salaskóla í Kópavogi. Stærðfræði og íþróttir eru uppáhaldsgreinarnar mínar.

Segðu mér aðeins frá Jólastjörnunni.

„Ég sendi inn myndband í Jólastjörnukeppnina og komst í úrslit fyrir topp tíu. Þá söng ég fyrir dómnefndina sem var skipuð Björgvini Halldórssyni, Gunnari Helgasyni, Jóhönnu Guðrúnu og Gissuri Páli. Einn daginn komu Björgvin Halldórsson og Ísland í dag í skólann minn og tilkynntu að ég hefði unnið. Það var alveg meiriháttar tilfinning. Síðan fékk ég að syngja á tónleikunum Jólagestir Björgvins með Jóni Jónssyni, Eyþóri Inga og fullt af flottu tónlistarfólki sem var mikill heiður. Tónleikarnir voru í Laugardalshöll og við sungum fyrir framan samanlagt 6.000 manns á tvennum tónleikum. Það var ótrúleg reynsla og upplifun.“

Hvernig kom það til að þú tókst að þér hlutverk Kuggs?

Þórhallur Sigurðsson leikstjóri hringdi í mig og bauð mér að koma og hitta sig. Við spjölluðum í smá tíma og ég las fyrir hann úr handritinu af Kuggi. Síðan hringdi hann aftur eftir nokkra daga og sagði að ég hefði fengið hlutverkið.

Hvernig gaur er Kuggur?

Kuggur er bara venjulegur og glaðlyndur strákur sem á svolítið skrýtnar og eldri vinkonur sem eru Málfríður og mamma hennar.

Hefurðu leikið áður?

Já, ég lék Bangsa litla í Dýrunum í Hálsaskógi og Sigga sæta í Latabæ. Svo lék ég hrakfallabálkinn Óla í sjónvarpsþáttunum Fólkið í blokkinni.

Hvernig gengur að samræma skólalærdóminn og leiklistina?

Það gengur bara rosalega vel því ég hef góðan kennara. Samt getur það verið erfitt stundum þegar mikið er að gera.

Ertu stressaður fyrir frumsýninguna um næstu helgi?

Nei, eiginlega ekki. Þetta er bara spennandi.

Syngurðu í leikritinu?

Já, það eru nokkur lög í leiksýningunni sem við syngjum öll saman.

Kanntu á eitthvert hljóðfæri?

Ég glamra aðeins á gítar og svo kann ég eitthvað á píanó líka. En ég kenni mér bara sjálfur.

Hver eru þín helstu áhugamál?

Fótbolti, söngur, tónlist og svo auðvitað leiklist.