Valdís og Ólafía enn í séns

Valdís Þóra Jónsdóttir og Ólafía Þórunn Kristinsdóttir hafa lokið þriðja hring í lokaúrtökumótinu fyrir keppnisrétt á sjálfri LET Evrópumótaröðinni.

Stelpurnar eru báðar á parinu eftir þrjá hringi og sitja jafnar í 41. sæti. Þær þurfa því að gefa í á morgun og koma sér nær 30. sætinu en sem stendur eru þær tveimur höggum frá því.

Leikið er á tveimur keppnisvöllum í Marokkó á lokaúrtökumótinu, Amelkis vellinum og Samanah vellinum. Alls eru leiknir fimm 18 holu hringir en aðeins 60 efstu af alls um 120 keppendum á lokaúrtökumótinu leika fimmta hringinn sem jafnframt er lokahringur keppninnar.