Ljósi varpað á uppbyggingu ráðuneyta ISIS

Íslamska ríkið hefur komið á legg sérstökum stofnunum til að halda utan um herföng eins og þræla, sölu fornminja, olíu og fleira. Það auðveldar þeim að halda yfirráðum á stórum svæðum í Sýrlandi og Írak. Skjöl sem bandarískir sérsveitarmenn komu höndum yfir þegar Abu Sayyaf var felldur hafa varpað nýju ljósi á uppbyggingu ISIS.

Abu Sayyaf var í raun yfirmaður fjármála ISIS og var hann felldur í maí. Gíslinum Kayla Mueller var um tíma haldið á heimili hans auk fjölmargra þræla samtakanna.

Sjá einnig: Bandarískir hermenn felldu háttsettan leiðtoga ISIS í Sýrlandi

Í samtali við Reuters fréttaveituna segja bandarískir embættismenn að skjölin hafi veitt þeim nýja innsýn í uppbyggingu hryðjuverkasamtakanna. ISIS hafa komið mörgum á óvart með getu sinni í að stjórna svæðum og að byggja um embættismannakerfi á yfirráðasvæðum sínum. Blaðamenn Reuters hafa fengið aðgang að hluta skjalanna, en sérsveitarmenn fundu umfangsmikið magn í árásinni gegn Sayyaf.

Þá hafa skjölin einnig veitt hernaðarbandalaginu gegn ISIS, sem leitt er af Bandaríkjunum, upplýsingar um skotmörk og veikleika í uppbyggingu samtakanna og olíuvinnslu þeirra.

Í skjölunum kemur fram að diwan, sem er í raun ráðuneyti, voru stofnuð til að halda utan um ýmsa þætti ISIS. Sérstök deild sér um sölu fornminja á svörtum mörkuðum. Abu Sayyaf var yfir því ráðuneyti.

„Íslamska ríkið hefur fjárfest meira en nokkur önnur hryðjuverkasamtök í þeirri hugmynd að þeir séu í raun eigið ríki. Formleg skipulagning þeirra styrkir þá ímynd samtakanna auk þess að nýtast vel þegar yfirráðasvæði þeirra er jafn stórt og raun er,“ segir Aymenn al-Tamimi, frá hugveitunni Middle East Forum og sérfræðingur í uppbyggingu ISIS.

Áhyggjur af líffærasölu

Meðal þess sem uppgötvaðist í skjölunum var dómsúrskurður þar sem vígamönnum var gert heimilt að taka líffæri úr föngum samtakanna. Í úrskurðinum segir að löglegt sé að taka líffæri úr fanga til að bjarga lífi múslima, þó það muni leiða til dauða fangans.

Enska þýðingu af úrskurðinum má sjá hér.