Rory fór í augnaðgerð

Það er stund milli stríða á PGA-mótaröðinni þessa dagana og flestir af bestu kylfingum heims taka sér kærkomið frí um jólahátíðarnar.

Rory McIlroy er einn af þeim sem nýtir sér fríið en hann skellti sér í lasermeðferð á augum í vikunni.

Sjónlagsaðgerðir eins og þessar geta lagað nærsýni, fjarsýni og sjónskekkju en yfirleitt tekur það fólk tvo til þrjá mánuði að jafna sig á slíkum aðgerðum.

Næsta mót sem Rory er skráður í er Abu Dhabi meistaramótið í enda janúar og því verður áhugavert að sjá hvort að hann nái því.

Sumir jafna sig þó mjög fljótt eftir aðgerðir eins og þessar en Tiger Woods gekst undir samskonar aðgerð árið 1999 og sigraði síðan á Disney Classic örfáum vikum síðar.