Langá á Mýrum áfram hjá SVFR

Stangaveiðifélag Reykjavíkur og Veiðifélag Langár hafa skrifað undir nýjan samning sem tryggir félagsmönnum SVFR og viðskiptavinum félagsins aðgang að þessari perlu á Mýrunum næstu árin.

Langá er ein besta laxveiðiá landsins og fagnar stjórn SVFR þessum áfanga en SVFR hefur haft Langá á leigu frá 2010. Langá er gjöful, falleg og fjölbreytt á með einstaklega góðu aðgengi og því vinsæl meðal veiðimanna. Frábær veiði var í Langá 2015 og vonir standa til að veiðin næsta sumar verði einnig góð. Eingöngu er veitt á flugu í Langá en síðasta sumar veiddust 2.612 laxar í ánni sem er þriðja mesta veiðin í Langá.

Skrifað var undir nýjan samning í höfuðstöðvum SVFR á bökkum Elliðaánna en í honum felst m.a. að kvóti veiddra fiska verður aukinn sumarið 2016. Heimilt verður að landa 15 löxum á heilum degi í stað 10 áður og leyfilegt verður að hirða 6 fiska á heilum degi í stað 10 áður. Sleppa skal öllum veiddum laxi sem er 70 cm eða stærri.

Göngur í Langá voru mjög kröftugar sumarið 2015 og veiðin var jöfn og góð yfir sumarið. Um 4.000 laxar gengu upp laxastigann í Skuggafossi fyrir ofan Strengina sem er veiðistaður nr. 10. Hluti göngunnar gengur sjálfan fossinn og því heildargangan mun stærri og einnig rétt að  hafa í huga að veiðistaðirnir neðan Skuggafoss eru mjög gjöfulir á fyrri hluta tímabilsins en þar veiddust 323 laxar.

Haustveiðin í Langá var einnig góð allt fram á síðustu daga tímabilsins. Mikið og gott vatn var í Langá allt sumarið en vegna þess hversu vatnið var kalt lengi vel hikaði laxinn við að ganga upp á Fjallið og það sama átti við um veiðimennina. Tæplega 1.500 laxar gengu upp laxastigann í Sveðjufossi en veiðiálag var mjög lítið eða tæp 27% % og segir í nýrri skýrslu Veiðimálastofnunar að ekki þurfi að hafa áhyggjur af hrygningu í svona árferði.