Tónleikar til heiðurs frægustu dóttur Parísar

Brynhildur Guðjónsdóttir leikkona er á leið á æfingu með hljómsveit vegna stórtónleika til heiðurs söngkonunni Edith Piaf þegar í hana næst – en á miðnætti kvöldinu áður var hún Njáll á Bergþórshvoli í Borgarleikhúsinu. Hún kveðst engan veginn geta gert upp á milli þeirra, þó ólík séu og þó vera búin að setja sig eins vel inn í líf beggja og kona á Íslandi geti gert í dag.

Piaf hefði orðið hundrað ára

Nú eru það tónleikarnir sem eru umræðuefnið, enda á dagskrá nú um helgina. Brynhildur segir þá gríðarlega spennandi.

„Jóhann G. Jóhannsson, fyrrverandi tónlistarstjóri Þjóðleikhússins, er búinn að útsetja sautján lög fyrir þann sterka og flotta hóp sem að flutningnum kemur,“ segir hún.

„Þeir Jóel Pálsson og Haukur Gröndal eru þarna og spila jöfnum höndum á klarinettið og saxófóninn. Svo er Eiríkur Orri Ólafsson á trompett, Margrét Arnardóttir á harmóníku, Bryndís Pálsdóttir á fiðlu og Jóhann G. á fallegan flygil.“

Brynhildur kveðst svo verða að keppa við öll instrúmentin til að láta rödd sína heyrast og ekki hætta fyrr en hún hafi lokið keppni með sigri!

„Við erum með sautján laga lista. Það eru lögin sem ég söng í sýningu Þjóðleikhússins á sínum tíma, 2004, og svo fimm ný. Lög sem hafa alltaf verið í uppáhaldi bæði hjá mér og Jóhanni G. Útsetningarnar hans eru þannig að ég fæ gæsahúð þegar ég heyri þær.“

Sögustundir verða inn á milli á tónleikunum þar sem fjallað verður um ævi söngkonunnar.

„Þetta verður hátíðarstund í tali og tónum til heiðurs þessari frægustu dóttur Parísar sem hefði orðið 100 ára laugardaginn 19. desember. Þá eru fyrri tónleikarnir okkar og af því að það seldist upp á þá, sem ég er mjög þakklát fyrir, þá bættum við öðrum tónleikum við daginn eftir, sunnudaginn 20. desember, klukkan 17 og enn eru nokkrir miðar til á þá tónleika. Við viljum fylla salinn af tónum og töfrum og verðum að fá vini Piaf til að vinna í því með okkur.

Við ætlum líka að heiðra Sigurð Pálsson sem er höfundur leikritsins en hann á 40 ára rithöfundarafmæli um þessar mundir.“

Fer í aðra vídd við flutninginn



Söng- og leikkonan ætlar að klæðast kjólunum sem hún skartaði í sýningu Þjóðleikhússins og eflaust sýnir hún leikræn tilþrif líka. „Það gerist sjálfkrafa þegar ég syng þessa tónlist,“ segir hún.

„Án þess að ég ætli að fara að verða einhver önnur en ég er þá er einhver hjartastrengur í þessari tónlist sem gerir að verkum að ég fer í aðra vídd þegar ég flyt hana. Þetta eru allt dásamleg lög.“

Brynhildur syngur jöfnum höndum á íslensku og frönsku.

„Þeir Þórarinn Eldjárn og Kristján Þórður Hrafnsson íslenskuðu nokkra af textunum fyrir sýningu Þjóðleikhússins og það er mjög merkilegt. Upphaflega vissum við ekki hvort það yrði mögulegt því íslenskan og franskan liggja á svo mismunandi stöðum í tempói. En það gekk ljómandi vel og nokkur af mínum uppáhaldslögum eru með íslenskum textum, þýðendurnir taka svo vel utan um þá. Það er líka gott. Þá skilja allir með höfðinu en sum lögin eru þannig að okkur nægir að skilja þau með hjartanu, eins og lagið La Vie en Rose eða Lífið í ljósrauðum bjarma.

Þótt Piaf-tónleikarnir falli inn í jólatónleikatímabilið segist Brynhildur ekki vera í neinni keppni.

„Við erum að bjóða upp á allt annan hlut. Borg eins og París með alla sína menningu, alla sína fegurð og það andrúmsloft sem hvergi þekkist nema hjá Frökkum – það er það sem við ætlum að stíga inn í.“