Flugverð heldur áfram að lækka

Flugverð lækkar áfram á milli mánaða, samkvæmt verðkönnun Dohop. Í heild lækkar flugverð um 4,7 prósent á milli mánaða, og vegur þar þungt lækkun á flugi til Finnlands um tæp 23 prósent og til Noregs um tæp 19 prósent.

Gögnin byggja á flugverði frá Íslandi næstu vikur til staða þar sem samkeppni er á markaðinum.

Verðið á flugi til 10 borga af 15 í könnun Dohop er á milli 35 og 50 þúsund krónur í haust, en þar á meðal eru vinsælir áfangastaðir á borð við París, Barcelona, Berlín, Amsterdam og Kaupmannahöfn. Flug til Bandaríkjanna kostar milli 75 þúsund og 95 þúsund krónur að meðaltali í könnuninni.

Ódýrast er að fljúga til Óslóar, þar sem Norwegian býður upp á lægsta farmiðaverðið.

„Dohop beitir sambærilegri aðferð og Hagstofa Íslands við samantekt gagna á fargjöldum. Þrjár dagsetningar eru skoðaðar hverju sinni: sú fyrsta er eftir tvær vikur, önnur eftir fjórar vikur og þriðja eftir átta vikur. Í hverri viku eru allir 7 dagar skoðaðir með vikudvöl í huga og meðaltal hverrar viku er endanlegt verð fyrir það tímabil,“ segir í tilkynningu fyrirtækisins um aðferð könnunarinnar.

Miðað er við einn farþega sem flýgur báðar leiðir með eina ferðatösku og handfarangur sem er minna en 5 kíló að þyngd.