Svona verður Hamilton heimsmeistari í Texas

Lewis Hamilton ökumaður Mercedes liðsins og ríkjandi heimsmeistari í Formúlu 1 er þegar með níu fingur á titli þessa árs. Hvernig getur Hamilton orðið heimsmeistari í Texas um helgina?

Staðan er sú að Hamilton er efstur með 302 stig, Sebastian Vettel, ökumaður Ferrari er annar með 236 stig og Nico Rosberg liðsfélagi Hamilton er þriðji með 229 stig. Aðrir eiga ekki möguleika á að verða heimsmeistarar.

Svona getur Hamilton orðið heimsmeistari um helgina:

Hamilton vinnur og Vettel endar þriðji eða neðar.

Ef Hamilton verður annar verður Vettel að enda í sjötta sæti eða neðar og Rosberg má ekki vinna.

Ef Hamilton verður þriðji má Vettel ekki komast ofar en í sjöunda sæti og Rosberg fjórða.

Ef Hamilton verður fjórði má Vettel ekki enda ofar en í níunda sæti, Rosberg má ekki komast ofar en í fimmta sæti.

Ef Hamilton verður fimmti má Vettel ekki enda ofar í tíunda sæti. Rosberg má ekki enda ofar en í sjötta sæti.

Vettel sagði á blaðamannafundi í dag að hann muni þurfa að nota fimmtu vélina í Texas og því mun hann færast aftur um 10 sæti frá því sæti sem hann klárar tímatökuna í. Vélin verður ný uppfærsla af Ferrari vélinni sem verður væntanlega grunnur liðsins fyrir vél á næsta ári.

Það er því afar líklegt að Hamilton verði orðinn heimsmeistari þegar þrjár keppnir verða eftir. það er þó ekki öruggt, það getur allt gerst í Formúlu 1.