Lincoln Continental frumsýndur í Detroit

Stjarna New York bílasýningarinnar í ár, stóri lúxusbíllinn Lincoln Continental, verður frumsýndur í endanlegri framleiðsluútgáfu á komandi bílasýningu í Detroit í Bandaríkjunum þann 11. janúar á næsta ári. Lincoln er undirmerki Ford sem framleiðir lúxusbíla líkt og Lexus er lúxusbílamerki Toyota. 

Bíllinn er lítið breyttur frá frumútgáfunni og kætir það flesta. Bíllinn mun koma á markað seinna á næsta ári. Hann mun bæði fást með framhjóladrifi og fjórhjóladrifi og verður meðal annars í boði með 3,0 lítra V6 EcoBoost bensínvél frá Ford.

Bíllinn verður settur saman í Flat Rock verksmiðju Ford í Michican, en þar eru einnig smíðaðir bílarnir Ford Mustang og Ford Mondeo, sem heitir reyndar Ford Fusion í Bandaríkjunum.

Lincoln Continental mun leysa af hólmi Lincoln MKS og verður framleiðslu þess bíls ekki hætt í verksmiðju Ford í Chicago í ótiltekinn tíma. Tilkoma Continental mun þó vafalaust minnka eftirspurnina eftir MKS og það gefur Ford kost á meiri framleiðslu Ford Explorer jeppans sem mikil eftirspurn er nú eftir.