„Hér eftir þarf ég alltaf að horfa mér um öxl“

Hollenska konan, sem dæmd var í ellefu ára fangelsi fyrir fíkniefnasmygl í síðustu viku, segir að þung refsing, í ljósi samvinnu hennar við yfirvöld, geti komið í veg fyrir að burðardýr gefi mikilvægar upplýsingar í fíkniefnamálum. Mirjam sýndi mikinn samstarfsvilja við rannsókn málsins en óttast nú um líf sitt.

Mirjam Foekje van Twuijver kom hingað til lands þriðja apríl síðastliðinn með flugi frá Amsterdam ásamt 17 ára dóttur sinni. Við tollaeftirlit  fundust í ferðatöskum þeirra rúm níu kíló af amfetamíni, 194 grömm af kókaíni og 10 kíló af MDMA.  Voru þær handteknar í kjölfarið.

Sjá einnig: Maðurinn neitar að hafa tekið við ætluðum fíkniefnum frá hollensku móðurinni

Mirjam játaði að hafa flutt efnin til landsins sem fundust í hennar farangri en neitar að hafa haft vitneskju um efnin sem fundust í tösku dóttur hennar.  Dótturinni var sleppt skömmu síðar en Mirjam var ákærð í málinu. Hún segist hafa verið stórskuldug, heimilislaus, lifað í ofbeldisheimi og talið þetta auðvelda leið til að bæta stöðu sína. Annað kom á daginn.

„Á hverjum  degi fer hún í gegnum huga minn – myndin – á hverjum degi. Hvernig gat ég verið svona vitlaus? Hvernig gat ég verið svo trúgjörn? En á þessum tímapunkti gat ég ekki annað. Ég gat ekki snúið við,“ segir Mirjam.

Mirjam var strax samvinnuþýð og sagði lögreglu frá fyrirmælum skipuleggjenda smyglsins. Í framhaldinu tók hún þátt í tálbeituaðgerð lögreglu á Hótel Fróni í Reykjavík. Á þessum tímapunkti höfðu vaknað upp grunsemdir hjá skipuleggjendum smyglsins, bæði í Hollandi og á Íslandi, um að þær mægður hefðu verið handteknar og þurfti hún sannfæra þá um hið gagnstæða.

„Hann bað mig um að hósta ef lögreglan væri við hlið mér, en ég gerði það ekki. Hann hringdi svo í mig nokkrum sinnum. Í fyrstu vildi hann að ég færi með töskuna í einhvern almenningsgarð í Reykjavík, legði hana frá mér og gengi í burtu, en lögreglan sagði mér að það gengi ekki og sagði mér að sannfæra hann um að koma á hótelið,“ segir Mirjam.

Héraðsdómur Reykjaness kvað upp 11 ára dóm yfir henni í síðustu viku. Sannað var fyrir dómi að Mirjam hafi verið  burðardýr. Refsiramminn er tólf ár og dómurinn því einn sá þyngsti sem kveðinn hefur verið upp í fíkniefnamáli hér á landi.

Sjá einnig: Ellefu ára dómnum yfir hollensku móðurinni áfrýjað til Hæstaréttar

„Ég greindi frá öllu sem ég vissi. Ég hjálpaði til við allt sem ég gat. Og í verðlaun fæ ég ellefu ár. Það er mjög þungbært. En það eru ekki aðeins þessi ellefu ár. Þegar ég fer aftur til Hollands byrjar refsing mín fyrir alvöru því ég þarf hér eftir alltaf að horfa mér um öxl. Ég hef ekki að neinu að hverfa í Hollandi,“ segir Mirjam.

Hún segist gera sér grein fyrir að brot hennar sé saknæmt og firrir sig ekki ábyrgð. Hún telur þó að þung refsing í ljósi samvinnu hennar við yfirvöld geti komið í veg fyrir að önnur burðardýr gefi mikilvægar upplýsingar í fíkniefnamálum í framtíðinni. Hún sé ekki síðasta burðardýrið sem fari á milli Hollands og Íslands.

„Ég er alls ekki sú eina sem notuð er til að flytja fíkniefni hingað til lands.“ 

Nánar verður fjallað um málið í Fréttablaðinu á morgun, fréttum okkar annað kvöld og í Íslandi í dag annað kvöld.