Lewis Hamilton heldur fyrsta sætinu

Lewis Hamilton kom fyrstur í mark í ítalska kappakstrinum. Mælingar á loftþrýstingi í dekkjum Mercedes bílsins voru taldar tilefni nánari skoðunar eftir keppnina.

„Við sögðum þeim hvernig hlutirnir gengu fyrir sig hjá okkur í dag. Það var aðili frá FIA sem mældi loftþrýstinginn. Eini munurinn á ferlinu okkar var að lágmarksþrýstingurinn var hærri. Við höfum þróað þetta ferli með tengilið okkar hjá Pirelli. Nú er bara að bíða eftir ákvörðun dómaranna,“ sagði Paddy Lowe, tæknistjóri Mercedes.

„Það eru öll lið á brautinni á mörkunum og alltaf allir að reyna á þanmörkin. Við erum ekki einir um það,“ sagði Hamilton áður en niðurstaðan lá fyrir.

Í niðurstöðu dómaranna segir: „Dómarar hafa úrskurðað að loftþrýstingur í dekkjunum var nægur þegar dekkin voru sett á bílinn.“

„Ákveðið hefur verið að engar frekari aðgerðir fari fram,“ segir enn fremur í niðurstöðu dómaranna.

„Dómarar hvetja dekkjaframleiðandann (Pirelli) og FIA (Alþjóða akstursíþrótta sambandið) til að funda fljótlega til að kveða um skýrari línur í þessum efnum,“ segir að endingu.