Fyrsta stiklan fyrir Deadpool frumsýnd

Fyrsta stiklan fyrir ofurhetjumyndina Deadpool var frumsýnd í þætti Conans O´Brien í Bandaríkjunum í gærkvöldi. Það er Ryan Reynolds sem fer með hlutverk Wade Wilson sem gengur undir nafninu Deadpool en myndin verður frumsýnd í febrúar 2016.

Stiklan er ekki fyrir hvern sem er því hún er alls ekki við hæfi barna. Deadpool er einn af óhefluðustu karakterum Marvel-myndasagnabálksins, kjaftfor, ruddalegur og kaldrifjaður morðingi sem hefur gengið svo langt að myrða allan Marvel-heiminn í myndasögunni Deadpool Kills The Marvel Universe.

Þessi mynd segir frá því hvernig Wade Wilson verður að Deadpool og leit hans að manninum sem rústaði nánast lífi hans.