Íslenskt silfur í slaktaumatölti

Úrslitadagurinn á heimsmeistaramótinu í Herning er runninn upp. Einni grein er nú lokið en það var keppni í slaktaumatölti þar sem Ísland fékk silfur.

Vignir Jónasson á Ivani frá Hammarby vann nokkuð örugglega í slaktaumatöltinu en Vignir keppir fyrir hönd Svíþjóðar. Reynir Örn Pálmason varð í öðru sæti en hann reið Greifa frá Holtsmúla. Þeir félagar voru aðeins 0,01 hærri en Johanna Tryggvason á Fönix frá Syðra-Holti en þau keppa fyrir hönd Þýskalands. Reynir og Greifi keppa einnig í úrslitunum í fimmgangi á eftir.

Næstu úrslit eru í tölti og hefjast þau innan skamms. Þar eiga Íslendingar fulltrúa í Sigurbirni Bárðarsyni á Jarli frá Mið-Fossum og Kristínu Lárusdóttur á Þokka frá Efstu-Grund.