Samkomulagið við Grikki felur þetta í sér

Grikkland mun fá nýtt neyðarlán upp á 82 til 86 milljarða evra samkvæmt samkomulaginu sem náðist eftir maraþonfund í Brussel í gær og í nótt.

Ný stuðningsáætlun lánadrottna Grikklandsstjórnar mun taka gildi þegar – eða ef – gríska þingið samþykkir tillögurnar. ESB krefst að það verði gert í síðasta lagi 15. júlí.

Samkomulagið felur í sér fjölda umbóta og aðhaldsaðgerða af hálfu gríska ríkisins, þar á meðal umbætur á lífeyrissjóðskerfinu og atvinnumarkaði, hækkun virðisaukaskatts, auk þess að hagstofa landsins skuli gerð sjálfstæð. Einnig skuli rýmka opnunartíma verslana. Í stuttu máli má segja að samkomulagið feli í sér hækkun skatta og mikinn niðurskurð.

Ekkert er minnst á afskriftir skulda, en evruríkin hafa opnað á þann möguleika að breyta skilyrðum varðandi endurgreiðslur gríska ríkisins. Þannig munu Grikkir sleppa við afborganir á tímabili og þeim frestað.

Í frétt SVT segir að sá liður samkomulagsins sem einna helst var deilt um var stofnun sérstaks einkavæðingarsjóðs, þaðan sem ætti að greiða afborganir, minnka skuldir ríkissjóðs og fjármagna fjárfestingar gríska ríkisins.

Mest var deilt um hver ætti að stýra sjóðnum. Að sögn heimilda vildi Evruhópurinn að sjóðnum skyldi stýrt frá Lúxemborg, en grísk stjórnvöld mótmæltu því harðlega. Samið var um að Grikkir skyldu stýra sjóðnum, en undir eftirliti „viðeigandi stofnana Evrópusambandsins“.

Hér má lesa samkomulagið í heild.