Loksins góður hringur hjá Tiger

Það virðist aðeins vera að rofa til hjá Tiger Woods eftir hörmulegt gengi á árinu en hann lék fyrsta hring á Greenbrier Classic mótinu sem hófst í dag á 66 höggum eða fjórum undir pari.

Tiger lék síðast á US Open fyrir tveimur vikum og endaði meðal neðstu manna en eftir það tók hann sér stutt frí frá golfi til þess að ná áttum.

Það virðist hafa borið árangur en hann fékk sjö fugla í dag, meðal annars þrjá í röð á síðustu þremur holunum.

Mesta sjáanlega breytingin á leik Tiger í dag voru upphafshöggin en hann hélt boltanum í leik og kom sér í fá vandræði af teignum.

Þegar þetta er skrifað er hann jafn í áttunda sæti mótsins, fjórum höggum frá Scott Langley sem átti frábæran fyrsta hring og kom inn á átta höggum undir pari.

Golfstöðin verður með beina útsendingu frá mótinu alla helgina og hefst hún frá fyrsta hring klukkan 20:00 í kvöld.