Fín veiði í Frostastaðavatni

Veiðimenn sem voru við veiðar í Frostastaðavatni um helgina gerðu fína veiði og það átti við um fleiri sem veiddu vatnið.

Mikið líf var í vatninu strax um morguninn á laugardaginn og þegar skilyrðin eru rétt eins og þá gengur bleikjan mjög nálægt landi og þá sérstaklega hraunmegin en einnig er gott að veiða norðanmeginn í vatninu sé vindáttinn norðlæg. Bleikjan sem var að veiðast var kannski ekki sérstaklega stór, mest af henni um eða rétt yfir eitt pund en slangur var þó af 2 punda bleikjum en ekki nema ein stærri en það. Samtals náðu þeir á þrjár stangir 54 bleikjum á laugardeginum og sunnudeginum og misstu mikið enda var takan að sögn mjög grönn.

Þetta er góður tími í vötnunum sunnan Tungnaár en þau vötn sem eru mest stunduð eru Frostastaðavatn, Dómadalsvatn, Eskivatn og Ljótipollur en í Ljótapolli má oft ná í væna urriða. Eitt má nefna sérstaklega en það er umgengin við sum vötnin en bjórdósir og annað rusl liggur meðfram bakkanum á nokkrum veiðistöðum og er það heldur döpur aðkoma í þessari veiðiparadís.