Sir Christopher Lee fallinn frá

Enski leikarinn Sir Christopher Lee er fallin frá, 93 ára að aldri. Hann var lagður inn á sjúkrahús í London vegna hjartabilunar og lést þar á sunnudagsmorgun.

Lee átti glæstan kvikmyndaferil. Hann gat sér gott orð í hryllingsmyndum á sjöunda og áttunda áratugnum og lék meðal annars Drakúla greifa í vinsælum myndum um vampíruna frægu.

Hann var oftar en ekki í hlutverki illmennis og er í seinni tíð meðal annars þekktur fyrir að leika Sarúman í Hringadróttinssögu og Dooku greifa í síðasta Stjörnustríðsþríleiknum.

Lee starfaði einnig sem tónlistarmaður og gaf út nokkrar þungarokksplötur þar sem hann söng sjálfur. Hann var sleginn til riddara árið 2009 fyrir framlag sitt til leiklistarinnar og fyrir góðgerðarstörf sín.

Síðasta mynd Lee, Angels in Notting Hill, kemur út síðar á þessu ári. Hér fyrir neðan má sjá samantekt á ferli Lee frá árinu 2011, þegar honum hlotnaðist heiðursverðlaun BAFTA, bresku sjónvarps- og kvikmyndaakademíunnar.

Fjölmargir samstarfsmenn, fréttamiðlar og aðdáendur leikarans minnast hans á Twitter eins og sjá má hér fyrir neðan. Tweets about christopher lee