Phil Mickelson í baráttunni á TPC Southwind

Þrír kylfingar deila efsta sætinu á St. Jude Classic sem fram fer á TPC Southwind vellinum en það eru þeir Brooks Koepka, Greg Owen og Ryan Palmer.

Nokkrir kylfingar koma á eftir þeim á fimm og fjórum undir pari en þar má ekki finna mörg stór nöfn enda flestir bestu kylfingar heims að undirbúa sig undir US Open sem fram fer í næstu viku.

Hinn vinsæli Phil Mickelson er þó meðal þátttakenda en hann byrjaði vel og kom inn á 68 höggum eða tveimur undir pari.

Þá er Graeme McDowell meðal þátttakenda en hann kom inn á 76 höggum eða sex yfir pari og virðist ekki vera í góðu formi fyrir US Open, en hann sigraði á mótinu árið 2010.

St. Jude Classic verður í beinni útsendingu á Golfstöðinni alla helgina og hefst útsending frá öðrum hring klukkan 20:00.