Massa: Mikilvægt að setja pressu á Ferrari

Felipe Massa annar ökumanna Williams liðsins í Formúlu 1 segir að það sé mikilvægt fyrir liðið að setja pressu á Ferrari í nánustu framtíð.

Massa bindur miklar vonir um að uppfærslur sem koma til nota í næstu keppni í Austurríki um komandi helgi stytti bilið í Ferrari.

Williams liðið hefur hingað til ekki komið með stórar uppfærslur á tímabilinu. Slíkt mun breytast um næstu helgi. Liðið ætlar sér að minnka bilið í Ferrari sem er 76 stig í dag.

„Ef við skoðum uppfærslurnar á Ferrari ve´linni og svo Mercedes vélina er munurinn enn svipaður og hann var og það styrkir trú mína á því að við eigum að geta barist meðal þeirra fremstu,“ sagði Massa.

„Ég tel að liðið sé á góðri leið. Næsta keppni er mikilvæg fyrir okkur, brautin hentar okkur vel og vonandi enn betur með komandi uppfærslum. Ég held að það sé mikilvægt fyrir okkur að setja pressu á Ferrari sem fyrst,“ sagði Massa.

Massa telur að væntanleg uppfærsla á Mercedes vélinni geti verið annað skref í átt að því að nálgast Ferrari enn frekar. Mercedes stefnir að því að uppfæra vél sína í kringum belgíska kappaksturinn.

„Ég veit ekki hvenær Mercedes uppfærir vélina en þegar það gerist færir það okkur vonandi enn nær Ferrari,“ sagði Massa að lokum.