Renault ætlar að hætta sem vélaframleiðandi

Renault hefur útilokað að halda áfram sem eingöngu vélaframleiðandi. Hár kostnaður og lítið auglýsingagildi eru nefndar sem helstu ástæður.

Franski vélaframleiðandinn hefur íhugað fjóra möguleika er varða framtíð Renault í Formúlu 1. Þessir möguleikar eru að hætta alveg, halda áfram sem vélaframleiðandi, auka gildi sitt innan Red Bull eða Toro Rosso eða snúa aftur sem eigið lið.

Niðurstaða fundar á milli yfirmanns Formúlu 1 deildar Renault, Cyril Abiteboul, stjórnarmanns Renault, Carlos Ghosn og Bernie Ecclestone virðist vera sú að Renault ætli ekki að halda áfram að vera einungis vélaframleiðandi.

Abiteboul sagði í viðtali við Motorsport, að auglýsingagildið fyrir Renault væri ekki nægjanlegt fyrir þann kostnað sem það hefur í för með sér að framleiða vélar fyrir Formúlu 1. Abiteboul nefndi einnig að kostnaðurinn við nýju V6 vélarnar hefði verið hærri en reiknað hefði verið með.

„Það eina sem ég get sagt er að það er okkar skoðun að það hafi fáa kosti að vera vélaframleiðandi eftir að skipt var yfir í nýju vélareglurnar,“ sagði Abiteboul.

„Það er búið að setja markið svo hátt að kostnaðurinn sem við þurfum að stofna til er of hár miðað við það auglýsingagildi sem við fáum til baka,“ bætti hann við.

Það eru því einungis þrír kostir eftir. Telja verður að ólíklegt sé að Renault hafi áhuga á að hætta alveg þáttöku í Formúlu 1. Aukin þátttaka innan Red Bull eða Toro Rosso er líkleg. Einnig gæti verið að Renault vilji taka alfarið yfir lið eins og Toro Rosso eða Force India, slíkt væri þó mjög dýrt.