Meiri vöxtur í sölu bíla til almennings en bílaleiga

Þrátt fyrir að mikil aukning sé í ár í sölu nýrra bíla til bílaleiga vegna hins mikla ferðamannastraum sem er nú til landsins er sala bíla til almenning örlitlu meiri. Sala bíla til bílaleiga hefur vaxið um 40% frá fyrra ári, en salan í heild er 41% meiri. 

Vel gengur að selja bíla hjá flestum bílaumboðum landsins. Sem dæmi eru nýskráningar bíla hjá BL ehf. fyrstu fimm mánuði ársins 48 prósentum fleiri en á sama tímabili 2014 og 7% prósentum fleiri en sem nam heildarstækkun bílamarkaðarins á tímabilinu í ár.

Alls voru skráðir 602 bílar hjá BL í maí; 202 til einstaklinga og fyrirtækja og 400 til bílaleiga. Almennt stækkaði markaðurinn um 20% í maí borið saman við maí 2014. Markaðshlutdeild BL til einstaklinga og fyrirtækja er nú 26,5% og 20,4% á markaði bílaleiga. Á sendibílamarkaði nemur hlutdeild BL 39 prósentum það sem af er ári.

Alls fengu bílaleigur landsins afhentan 3531 bíl frá bílaumboðunum fyrstu fimm mánuði ársins, þar af 1957 bíla í maí. Miðað við apríl nemur aukningin 1180 bílum. Það sem af er ári hefur floti bílaleiganna ekki haldið í við vöxt bílamarkaðarins í heild sem var 41% fyrstu fimm mánuði ársins, en 39,8% til bílaleiga. Á árinu 2014 keyptu bílaleigurnar alls 4462 bíla.