Missti 40 kíló á fimm mánuðum eftir að hann hætti í NFL-deildinni

Nick Hardwick hætti að spila í NFL-deildinni á síðasta ári. Með því breyttist mataræðið og maðurinn líka.

Hann meiddist í fyrsta leik á síðasta tímabili og þá var strax ljóst að hann myndi ekki spila meira. Hardwick grunaði að hann myndi líklega ekki spila meira á ævinni og fór því að borða eins og venjulegur maður.

Hardwick er ekki stór maður af náttúrunnar hendi og þurfti að borða óhemju mikið til þess að halda stærð sinni og stöðu í NFL-deildinni.

Hann var orðinn 134 kíló en þegar hann hætti að borða eins og NFL-leikmaður þá lak af honum lýsið. Nánar tiltekið fuku af honum heil 40 kíló á aðeins fimm mánuðum.

Matseðillinn hjá honum er hann spilaði í NFL-deildinni var ekkert eðlilegur.

• Dagurinn byrjaði á 600 kaloríu sjeik og prótein-stykki klukkan 4.45.
• Eftir fyrstu æfingu var drukkinn 300 kalorríu Gatorade prótein-sjeik.
• Eftir sturtu drakk hann búst með öllu mögulegu í. Í bústinu voru venjulega fimm egg, pylsur og stór mjólkurferna.
• Þegar verið var að fara yfir myndbönd úðaði hann í sig hnetum.
• Fyrir hádegismat drakk hann tvo sjeika sem voru um 700 kaloríur.
• Hádegismaturinn var salat með eins miklu próteini ofan á og mögulegt var. Einnig borðaði hann mikið brauð.
• Í kvöldmat var steik, kartöflur og grænmeti.
• 90 mínútum eftir kvöldmat var komið að því að éta stóra skál af grísku jógúrti með morgunkorni ofan á.
• Áður en skundað var inn í rúm át hann stóra dollu af Ben & Jerry's ís. Kaloríumagnað í dollunni er yfir 1.000.

Í dag borðar Hardwick hollan og lífrænan mat. Hann er mikið í salatinu, stundar jóga og fer reglulega í göngutúra.