Orri áfram hjá Val til 2017 | Sigurði ætlað að fylla skarð Stephens

Orri Freyr Gíslason hefur skrifað undir nýjan tveggja ára samning við handknattleiksdeild Vals.

Orri, sem verður 27 ára í lok mánaðarins, er uppalinn Valsmaður og hefur spilað með félaginu alla tíð fyrir utan eitt tímabil með Viborg í Danmörku.

Orri skoraði 27 mörk í 26 deildarleikjum með Val í vetur en hann spilaði mestmegnis í vörninni.

Þá hefur markvörðurinn Sigurður Ingiberg Ólafsson snúið aftur á Hlíðarenda eftir tveggja ára dvöl hjá Stjörnunni.

Sigurður kemur í stað Stephens Nielsen sem hefur leikið sinn síðasta leik fyrir Val. Danski markvörðurinn lék eitt tímabil með Val en hann gekk í raðir liðsins frá Fram í fyrrasumar.