Dómur fallinn: Sex mánaða bann fyrir steranotkun

Dómur er fallinn í máli FH-ingsins Jóhanns Birgis Ingvarssonar sem féll á lyfjaprófi eftir bikarúrslitaleik FH og ÍBV í lok febrúar.

Niðurstaða dómsins er sex mánaða bann en niðurbrotsefni af anabólískum sterum fundust í sýni Jóhanns. Þetta staðfesti Skúli Skúlason, formaður lyfjaráðs ÍSÍ, í samtali við Vísi í dag.

Jóhann hefur fengið dóminn sendan en hann verður birtur á heimasíðu ÍSÍ á mánudaginn.

„Hann hefur áfrýjunarrétt og getur áfrýjað þessum dómi ef hann vill,“ sagði Skúli en refsingin sem Jóhann fékk þykir í vægari kantinum.

Jóhann hélt því fram að fæðubótarefni hefði orðið honum að falli en tók þó aldrei fram um hvaða efni var að ræða.