Víkingur nældi í Atla Karl

Nýliðar Víkings í Olís-deild karla fengu sinn fyrsta liðsstyrk í dag.

Þá samdi félagið við Atla Karl Bachmann en hann kemur til félagsins frá HK. Atli er 24 ára gamall og er örvhent skytta. Hann skrifaði undir þriggja ára samning.

„Ég hef fylgst vel með uppbyggingunni og umgjörðinni í kringum liðið á liðnum vetri og líst vel á metnaðarfull áform félagsins. Ég hef líka unnið með Ágústi Jóhannssyni áður og kann vel að meta hans áherslur. Þar sem að ég hef leikið með sama félaginu alla tíð þel ég að nú sé góður tími til að breyta til, takast á við nýjar áskoranir og þróast sem handboltamaður,“ segir Atli Karl í fréttatilkynningu frá Víkingum.