Justin Rose sigraði í rigningunni í New Orleans

Justin Rose tryggði sér sinn sjöunda sigur á PGA-mótaröðinni á ferlinum með tveimur fuglum í röð á síðustu tveimur holunum á TPC Louisiana vellinum en hann lék besta allra á Zurich Classic mótinu sem kláraðist nú í kvöld.

Rose lék hringina fjóra á 22 höggum undir pari, einu betur heldur en Bandaríkjamaðurinn Cameron Tringale sem kom höggi á eftir á 21 höggi undir pari en Boo Weekley endaði einn í þriðja sæti á 20 höggum undir pari.

Það er greinilegt að Rose er að spila sitt allra besta golf þess dagana en fyrir tveimur vikum endaði hann í öðru sæti á Masters mótinu og hefur hann því samanlagt unnið sér inn rúmlega 250 milljónir í þessum tveimur mótum.

Hann er vel að því verðlaunafé kominn en til marks um spilamennsku Rose þá fékk hann ekki einn einasta skolla á öðrum, þriðja og fjórða hring í mótinu nú um helgina sem verður að teljast ótrúleg tölfræði.

Næsti viðburður á PGA-mótaröðinni er heimsmótið í holukeppni sem fram fer í San Francisco og hefst það á miðvikudaginn.