Fín opnun í Litluá í Kelduhverfi

Þessa dagana hópast veiðimenn að ánum og vötnunum sem eru þegar komin í gang og það berast ágætar fréttir frá flestum opnunum.

Litlaá í Kelduhverfi fór til að mynda ágætlega af stað miðað við erfiðar aðstæður en að sögn þeirra veiðimanna sem voru þar við veiðar var mikill krapi og ís frá Ræsi og að Brunnárbreiðu.  Það var líka hvasst, skafrenningur og ansi kalt í veðri sem gerir veiði á þessum árstíma ekkert annað en gífurlega áskorun á þolinmæði.  Þrátt fyrir þessar erfiðu aðstæður komu 32 fiskar á land og voru þeir allir í góðum holdum.  Sá stærsti var um 70 sm en annars var meðalstærðin nokkuð góð.  Framundan er frábær tími í ánni svo ekki sé talað um ef það hlýnar aðeins þá verður sannkölluð veisla við bakka Litluá.  Þeir sem vilja komast í ánna í vor ættu að kíkja inná www.veida.is en örfáir dagar eru ennþá lausir.

Af öðrum veiðisvæðum norðan heiða er lítið að frétta.  Það ríkir ennþá fimbulvetur á þessum slóðum og nokkuð í að það verði hreinlega veiðanlegt á fleiri svæðum.  Vötnin opna flest ekki fyrr en 1. maí en það má meira að segja reikna með að þau verði ekki öll íslaus á þeim tíma svo þykkt er íslagið á þeim mörgum þessa dagana.