Nýr vildarklúbbur hjá Lax-Á hefur göngu sína

Nú er ekki nema mánuður í að stangveiðitímabilið hefjist og veiðimenn eru í óðaönn að bóka daga fyrir sumarið.

Veiðifélögin eru með gott úrval veiðisvæða og þar getur hver fundið veiðisvæði við sitt hæfi.  Lax-Á hefur í sömu andrá sett á laggirnar sérstakan Vildarklúbb þar sem meðlimum verður meðal annars boðinn aðgangur að svokölluðum "last minute" veiðileyfum en það eru óseld leyfi þar sem stutt er í veiðidaga, eins leyfi á svæðum sem er verið að kynna þá sérstaklega fyrir meðlimum.  Aðgangur að Vildarklúbbinum er ókeypis og meðal þess sem meðlimir fá er fréttabréf frá klúbbnum, regluleg tilboð á veiðileyfum, forgangur á "last minute veiðileyfum" og skemmtikvöld þar sem Lax-Á mun kynna valin veiðisvæði heima og að heiman.

Veiðileyfasalar bera sig annars vel en mun meira er bókað en reiknað var með þrátt fyrir slaka veiði í fyrra.  Eitthvað er samt eftir af veiðileyfum víða en fastlega má reikna með að einhverjir Íslendingar bíði átekta eftir því að sjá hvernig veiðin fer af stað og ef sumarið byrjar vel má reikna með því að restin af þeim dögum í bestu ánum verði ansi fljótir að fara.