Manor með til Melbourne

Manor liðið hefur staðfest að 2015 bíll liðsins sé reiðubúinn og mæti í fyrstu keppni tímabilsins í Ástralíu eftir 10 daga.

Breska liðið sem reist er á grunni hins gjaldþrota Marussia liðs segir að síðasta hindrunin sé nú yfirstigin. Verið er að leggja lokahönd á að gera bílnn kláran. Hann mun vera í fluginu til Melbourne seinna í vikunni.

Graeme Lowdon, keppnisstjóri liðsins sagðist ekki hafa verið viss um að þetta myndi takast. „Ég er afar spenntur að geta tilkynnt að þökk sé mikilli vinnu fjölda fólks, þá erum við tilbúin að taka þátt í kappakstri aftur,“ sagði Lowdon.

„Síðustu mánuðir hafa verið sannkölluð rússíbanareið - ég vil sérstaklega þakka aðdáendum okkar,“ bætti Lowdon við.

Manor hefur tímabilið með 2014 bíl Marussia liðsins sem búið er að breyta til að hann standist nýjar reglur um hönnun. Fullunninn bíll verður kynntur seinna á tímabilinu.

Liðið hefur staðfest að Will Stevens muni aka fyrir liðið en hinn ökumaðurinn er enn annað hvort ófundinn eða leyndarmál.