Cadillac Championship hefst í kvöld

Stærsta mót ársins hingað til í golfheiminum, Cadillac Championship, hefst í dag á Doral vellinum í Flórídaríki.

Mótið er það fyrsta í röðinni á heimsmótaröðinni í golfi en aðeins 70 bestu kylfingar heims hafa þátttökurétt um helgina og þeir munu skipta með sér níu milljónum dollara eða rúmum milljarði íslenskra króna í verðlaunafé.

Bandaríska ungstirnið Patrick Reed sigraði á mótinu í fyrra og kynnti sig þar með rækilega fyrir golfáhugamönnum um víða veröld en hann hefur leikið vel að undanförnu og á eflaust eftir að verja titilinn af krafti.

Fleiri stjörnur eru líklegar til þess að láta til sín taka um helgina en þar má meðal annars nefna Bubba Watson sem hefur byrjað tímabilið mjög vel, Ástralann Adam Scott sem hefur tímabil sitt á PGA-mótaröðinni um helgina og besta kylfing heims, Rory McIlroy, sem hefur nú þegar sigrað í móti á árinu.

Tiger Woods verður þó fjarri góðu gamni þar sem hann hefur ekki þátttökurétt á mótinu í ár eftir að hafa hrapað niður heimslistann á undanförnum misserum.

Golfstöðin sýnir beint frá Doral alla helgina en útsending frá fyrsta hring hefst klukkan 18:00 í kvöld.