Einar Kristinn í 48. sæti í stórsvigi á HM

Einar Kristinn Kristgeirsson endaði í 48. sæti í stórsvigi á HM í alpagreinum sem fer fram þessa dagana í Vail og Beaver Creek í Bandaríkjunum.

Einar Kristinn var með 55. besta tímann í fyrri ferðinni og 47. besta tímann í seinni ferðinni en átta skíðamenn sem komust í seinni ferðina náðu ekki að klára.

Einar Kristinn gerði þar með betur en Helga María Vilhjálmsdóttir sem náði 56. sæti í stórsvigi kvenna í gær.

Einar Kristinn fór tíu sekúndubrotum hraðar í seinni ferðinni en í þeirri fyrri. Hann fór báðar ferðirnar samanlagt á 2:49.60 mínútum sem þýðir að hann var 15,44 sekúndum á eftir heimsmeistaranum Ted Ligety frá Bandaríkjunum.

Ted Ligety tryggði sér gullið með frábærri seinni ferð en hann var í fimmta sætinu eftir fyrri ferðina.

Austurríkismaðurinn Marcel Hirscher, sem var fyrstur eftir fyrri ferðina varð að sætta sig silfur og Frakkinn Alexis Pinturault tók bronsið.