Stemning í stúkunni í Sprettshöllinni

Margt var um manninn og stemning í stúkunni í Sprettshöllinni  í Kópavogi í gærkvöldi þegar keppni fór fram í fimmgangi í áhugamannadeildinni.

Þórunn Hannesdóttir á glæsihestinum Austra frá Flagbjarnarholti sigraði örugglega og skaut öllum strákunum ref fyrir rass í úrslitunum.

Þórunn átti brekkuna og var klappað lof í lófa fyrir sýningu sína. Áhorfendur létu ekki leiðindaveður trufla sig og mættu í Sprettshöllina til að hvetja sitt fólk áfram, eins og sjá má á meðfylgjandi myndasyrpu.

Í áhugamannadeildinni urðu úrslit þessi:

1. Þórunn Hannesdóttir / Austri frá Flagbjarnarholti 6,52

2. Árni Sigfús Birgisson / Sjór frá Ármóti 6,19

3. Sigurbjörn J Þórmundsson / Leistur frá Hemlu II 5,90

4. Þorvarður Friðbjörnsson / Þengill frá Þjóðólfshaga 1 5,79

5. Játvarður Jökull Ingvarsson / Kappi frá Dallandi 5,69

6. Leó Hauksson / Bú-Álfur frá Vakurstöðum 5,62

7. Sigurður Grétar Halldórsson / Álmur frá Skjálg 4,05

Keppni í hestaíþróttum er nú að komast á fullt skrið og ber Meistaradeildina hæst, en frá henni er sýnt beint á Stöð 2 Sport aðra hverja viku.

Næsta keppni fer fram í fimmgangi fimmtudaginn 26. febrúar og hefur Vísir heimildir fyrir því að þar mæti knapar með mjög sterka hesta til leiks, meðal annars kemur Íslandsmeistarinn í fimmgangi Hulda Gústafsdóttir með hinn fasmikla Birki frá Vatni.

Á Stöð 2 Sport eru einnig sýndir upprifjunarþættir Meistaradeildarinnar, einnig á fimmtudagskvöldum, þar sem farið er yfir hverja keppnisgrein, rætt við sigurvegara og dómarar skýra einkunnagjöf og sýningar. 

Hér fyrir neðan má sjá myndasyrpu frá mótinu í Sprettshöllinni.