Renault vill að lágmarki vinna fimm keppnir

Renault vill vinna að lágmarki fimm keppnir og stefnir á að minnka aflmuninn á milli sín og Mercedes um helming fyrir fyrstu keppni.

Franski vélaframleiðandinn viðurkennir að í lok síðasta tímabils hafi Mercedes vélin verið um 60 hestöflum öflugari en Renault vélin. Renault stefnir á að munurinn verði um 30 hestöfl fyrir fyrstu keppnina í Ástralíu.

„Við vonumst til að geta helmingað bilið fyrir upphaf tímabilsins í Melbourne. Ólíkt Mercedes munum við hefja tímabilið með 2015 útgáfuna af vélinni okkar,“ sagði framkvæmdastjóri Renault, Cyril Abiteboul. Hann gaf í skyn að Mercedes myndi nota 2014 vélina í fyrstu keppnum ársins. Mercedes hefur hins vegar staðfest að liðið muni nota 2015 vél sína frá upphafi.

Abiteboul segir að Renault muni eiga um 10 þrónarinneignir eftir til að nota yfir tímabilið, þeir hafa þegar notað nokkurn fjölda þeirra til að þróa vélina yfir vetrar mánuðina.

„Við höfum notað um tvo þriðju af þróunarinneignum okkar til að breyta vélinni í ár. Mitt markmið er að vinna að minnsta kosti fimm keppnir í ár,“ bætti Abiteboul við.

Þróunarinneignir eru í heildina 66 í formúlu 1 vél. Sumir hlutar vélarinnar standa fyrir meira en aðrir, allt eftir mikilvægi þeirra. Mercedes, Renault og Ferrari fá inneign upp á 32 hvert. Liðin geta svo notað sína þróunarinneign til að breyta vélinni.