Guðmundur ráðinn landsliðsþjálfari

Besti borðtenniskappi Íslandssögunnar, Guðmundur Stephensen, hefur verið ráðinn landsliðsþjálfari í íþróttinni.

Í fréttatilkynningu frá Borðtennissambandinu kemur fram að hann sé meðal annars ráðinn vegna Smáþjóðaleikanna sem fara fram á Íslandi í sumar. Guðmundur tekur við starfinu af Bjarna Þ. Bjarnasyni.

Guðmundur mun boða til landsliðsæfinga fljótlega og hefja þar með undirbúning fyrir Smáþjóðaleikana.

Þessi snjalli kappi varð Íslandsmeistari í íþróttinni 20 ár í röð en ákvað þá að láta við sitja þó svo hann væri enn rétt rúmlega þrítugur.